Defrag

Defrag

هنتكلم النهرده عن موضوع جديد و هو الـ Defrag  ... يعني اي بقا ؟؟

اولا الـ  Defrag  يعني اعاده تاهيل الهارد ... بمعني اعاده تنظيم المساحه داخل كل Partition  من  الـ Hard .

اتكلمنا قبل كدا عن ال Cluster  و عرفنا ان مساجه الـ partition بقا بتتقسم لحاجه اسمها cluster وطبعا كل cluster بيكون ليه مساحه معينه و بتختلف المساحه ديه باختلاف نوع formatting system ... يعني مثلا انت عندك نوم formatting system عباره عن FAT 32 فبيكون حجم ال cluster في الوقت دا حوالي 16KB لكن ان كان ال formatting system عباه عن NTFS فبيكون حجم ال cluster حوالي 4KB وبس .

جميل قوي لحد كدا ... المشكله هنا بقا ان لما بنحفظ الـ  Data رقم 1 في عدد من الـ Cluster  المتتالي بيكون تمام ... نيجي نحفظ  Data رقم 2 في عدد من الـ  Cluster  جميل بردو ... هنفرض اننا هنمسح Data رقم 1 العندنا الكانت واخده مثلا 3 Cluster  و عايزين نضيف Data رقم 3 لكن هتحتاج 5 Cluster ... في الحاله ديه اول 3 Cluster  الفاضيين هيتحط فيهم ال Data رقم 3 لكن طبعا ال Data رقم 3 محتاجه 5 Cluster يبقا هتاخد من مساحه الـ Partition العدنا 2 Cluster بعد الـ Data رقم 2 ... 

شايفين هنا اي المشكله ؟؟

كدا الـ Data مش مترتبه في الـ Cluster علي ال Partition ... وهيكون في صعوبه لما نيجي نفتح ملف اعبال ما نستدعي ال Data !!

الحل عندنا في موضوع الـ Defrag  يعني من الاخر هنعمل عمليه تاهيل للهارد من جديد بحيث الـ Data تكون جمب بعض ومش يكون في مساحه فاضيه في النص .

طبعا ممكن تضبط انت Schedule بحيث يتعمل عمليه ال Defrag لل Partition  لوحده خلال فتره معينه انت بتحددها :)

ممكن توصل للموضوع دا ان دخلت علي Disk defragment .

و ممكن من خلال ال Cmd  تكتب ... defrag partition name: -f

خلي بالك علشان تعمل العمليه ديه لازم يكون في مساحه فاضيه في ال partition حوالي 15% من حجم ال partition :)

اتمني اكون قدمت معلومه جديده :)

شير .. ضيف معلومات اكتر وعلم غيرك (y)

نجد العلم عندما نبحث عنه (3)

مشكله التعلم الذاتي self study problem 

(2)

بيكون قدامك كتير قوي علشان تخلص حاجه ... يعني مثلا حاليا انا بدرس كورس Server  درست حوالي 7 ساعات من اصل حوالي 50 ساعه !! طبعا الـ 7 ساعات علشان ادرسهم بقالي حوالي 10 ايام متوسط الدراسه في اليوم حوالي ساعتين يعني حوالي 20 ساعه !! تخيل حوالي 20 ساعه علشان تخلص 7 ساعات بس ..

حد يعرف السبب في كدا ؟؟ ليه لما بندرس الكورس لوحدنا بناخد وقت ؟؟ ليه ساعه دراسه ممكن تاخد مننا ساعتين و ممكن 3 ساعات ؟؟ 

بص يا سيدي اولا الساعه البتدرسها انت كل دقيقه ممكن توقف الفديو مثلا   علشان تعيد معلومه تسمعها تاني علشان تركز اكتر ... ممكن ان بتدرس من كتاب معلومه وقفت معاك فالنتيجه انك بتدور علي المعلومه ديه علشان تفهمها .. علشان كدا لما تدرس مع مدرب مثلا بيكون سهل ليك ومش بياخد وقت منك قد ما التعلم الذاتي بياخد وقت ... علي طول معلومه وقفت معاك ممكن تسئل وتاخد الحل .. 

طبعا محدش بيتجه للتعلم الذاتي حبا فيه بنسبه 100% .. النسبه الكبيره بيكون لاسباب كتير .. مش قادر علي تكلفه كورسات .. مش عنده الوقت المناسب انه يروح مراكز ويدرس كورسات ... وغير كدا كتير ... لكن شخصيا بحاول اخلي السبب الاساسي ليا اني اكون بحب التعلم الذاتي ... مع ان ممكن يكون المشكلتين دول بالنسبه ليا موجودين بردو .

محدش بيتعلم بسهوله ولا حد بيتعلم كل حاجه في وقت واحد .. النهرده عندك معلومه بكره هيكون عندك اتنين ان اتعلمت معلومه علي معلومه و ربطهم ببعض صح .

خلاصه الكلام .. ( نجد العلم عندما نبحث عنه ) :)

( دور وانت تلاقي .. اسئل وانت تعرف )

استعن بالله ولا تعجز قبل اي حاجه :)


شير وعلم غيرك او اعمل منشن لاي حد محتاج الكلام دا (y)

‫#‏نجد_العلم_عندما_نبحث_عنه‬
‫#‏خلي_دايما_طريقك_GO‬
‫#‏ادمان_تجربه‬

السؤال الـيومي !

السؤال الـيومي !

اولا كل سنه وانتو طيبين ...  رمضان مبارك عليكم جميعا :)

السؤال الـ بقا بالنسبه ليا سؤال يومي :)

ناس كتير بتسئل وبتحب تعرف تبدا ازاي في مجال ال Network ... كلنا عارفين ان مجال ال Network  جواه مجالات كتير ... لكن الفكره مش فكره ازاي تبدا في مجال منهم ... الفكره ازاي تمهد نفسها للمجال صح :)

بصوبقا انا في الكلمتين دول هحاول اقول بدايتي في المجال كانت عامله ازاي وسمعت اي وعملت اي وكل حاجه باذن الله :)

نقول بسم الله ونبدا ;)

اولا كدا انا بدات المجال بكورس N+  كانت بدايه حلوه وبدات افهم يعني اي المجال واستوعبت كام حاجه بسيطه كدا :)

طبعا ان حابب تاخد البوست في مركز ممكن عادي ... لكن انا شايف انك تدرسه لوحدك علي اليوتيوب يعني في فديوهات كتير عن الموضوع :)

وان حابب لنك من لنكات كتير اتفضل :)

https://www.youtube.com/watch?v=_IXnQX-SkEs&list=PL0C86B761AA16B20C

جميل قوي :) بعد ما درست الكورس اين كان لوحدك او في مركز واستوعبت الكورس كويس كدا انت عملت خطوه جميله :)

طويب في ناس هتحب تعرف ه والكورس بيتكلم عن اي اصلا ... بض هو  اصلا كورس من شركه  comptia بيعرفك بدايات الشبكات ببساطه كدا الكورس هيعرفك يعني اي شبكات و وبعض المعلومات عن انواع الشبكات و ازاي تكون شبكه  وكدا ...

بعد ما  تخلص عايزك تشوف الكام سلسله دول ... مهمين جدا جدا ليك شخصيا بدات بيهم وكانو سبب في استعاب بعض المعلومات الكويسه :)


اول سلسله فديوهات  هي سلسله فديوهات المهندس عادل الحميدي و هتفيدك جدا بجد وعنونها " من أين أبدأ وكيف أبدأ في الشبكات ؟ "

https://www.youtube.com/watch?v=AvbDiZpwJf4&list=PLCIJjtzQPZJ_nzpIv6-UElLXufDE0psuY

تاني سلسله فديوهات هي بردو للمهندس عادل الحميدي عن ال IP

https://www.youtube.com/watch?v=HnzmPrLVKwA&list=PL63637C9C400CBC21

ثالث  سلسله بردو للمهندس عادي الحميدي عن OSI

https://www.youtube.com/watch?v=oF16zJ50y6I&list=PLFjr7QsNng22Ifnth_omlvur_Vpq3HV9H

 خلص المجموعه الجميله ديه الاول وبعد كدا ممكن نقول نعمل اي ان شاء الله ... وعلي فكره نصيحه ليك شوف الفديو دا قبل اي حاجه لاني بشرح فيه ازاي تبدا في مجال الشبكات عموما :)

https://www.youtube.com/watch?v=ch8YzcnpJ4U&index=2&list=PLoRFVLvEcsq6MSTzaq9SBqPT-yc5Ck23g

بالتوفيق للجميع :)

شير في الخير وفيد غيرك ... او اعمل منشن لصحبك المحتاج الكلام دا :)

#‏نجد_العلم_عندما_نبحث_عنه‬ 
‫#‏خلي_دايما_طريقك_GO‬
‫#‏ادمان_تجربه‬

نجد العلم عندما نبحث عنه (2)

مشكله التعلم الذاتي  self study problem 

(1)

ببساطه اي انسان بيفكر يبدا في اي مجال  بيكون قدامه كذا طريق  ...  ممكن يبدا ياخد كورسات مع ناس ويتعلم ... او ممكن يبدا يتعلم لوحده self study ... في اول حاله هيكون في متابعه من المدرب مثلا  و تقدر تسئل بسهوله في نفس الوقت ان في مشكله  ويحلهالك يعني  ... في الحاله التانيه بقا self study هيكون الموضوع معتمد عليك انت وبس  معتمد علي انك هتقدر تكمل ولا مش هتقدر تكمل ... ولازم نعرف ان الحاجه الوحيده الـ هتكون سبب اساسي انك تكمل " الحافز الداخلي " علشان كدا لازم يكون جواك حافز كبير و سبب مهم بتتعلم علشانه .

في ظاهره موجوده  دايما كلنا بناخد بالنا منها  وهي نتيجه مهمه لل self study و نتيجه بتبين ان مش سهل الموضوع خالص  وبيحتاج عزيمه واصرار و صبر كبير ... ادخل علي اي كورس علي اليوتيوب مثلا و شوف المشاهده لاول فديو  وشوف المشاهد لتاني فديو  وثالث فديو  وكمان اخر فديو  !!

النتيجه هتكون ايه مثلا ؟؟؟ تخيل كدا ...

مثلا في كورس معين كانت مشاهده اول فديو حوالي 52000 و تاني فديو حوالي 25000 وتالت فديو حوالي 13000 اما بقا اخر فديو حوالي 6000 بس  ... نستنتج اي من الموضوع دا ؟؟

اولا في نقطه لازم نتكلم فيها .. ممكن يكون ال بيشرح  مش قد كدا فعلشان كدا العدد يقل ... ممكن يكون  المحتوي مش مهم قوي  فعلشان كدا العدد قل ... ممكن لاي  سبب العدد يقل يكون سبب بعيد عن الدارس  " الطالب " ... في الحاله ديه المشكله خارجيه في ايد المدرب .

لكن في المثال القلت عليه ... المهندس البيشرح  ما شاء الله عليه بشهاده اغلب الناس و المحتوي مهم جدا جدا  . " جايز في سبب يكون  نتيجه ان العدد يقل  مش اعرفه الله اعلم " 
لكن الظاهر ان السبب في الطالب في الحاله ديه :)

زي ما قلنا  السبب بيكون في الطالب ... مش قادر يكمل !! شايف ان كفايه كدا 3 فديوهات او 5 فديوهات قال انا كدا زي الفل وكفايه !! دا سبب بردو بيحصل كتير ... لكن سبب كبير هو الاحباط مثلا اين كان من  مين الاحباط دا  او شكله ايه ... جايز مش قادر يكمل اومش عارف يخلص لان مفيش مراقبه عليه بيكسل  يفضل يقول انا هخلص كذا في وقت كذا وفي الاخر مش يخلص حاجه .

جايز واحد يقول ليا ان نسبه ال 10% الخلصو الكورس نسبه كويسه ... هي ماشي نسبه كويسه وهنا التميز في الموضوع ... ان مش معلومات شخص هتكون زي معلومات واحد تاني ... هنا المقياس في الموضوع ... بس بنتمني النسبه تزيد شويه و نشوف حلول من المدربيين في اي مجال علشان يزودو التفاعل معاهم و الناس تستفاد اكتر  :)

دور علي العلم الـ انت عايزه هتلاقي باذن الله وحاول تكمل ومش تستسلم بسهوله و دايما استعن بالله ولا تعجز قبل اي حاجه و خلي دايما طريقك GO  =D

خلاصه الكلام .. ( نجد العلم عندما نبحث عنه ) :)

( دور وانت تلاقي .. اسئل وانت تعرف )

استعن بالله ولا تعجز قبل اي حاجه :)

شير وعلم غيرك او اعمل منشن لاي حد محتاج الكلام دا (y)

‫#‏نجد_العلم_عندما_نبحث_عنه‬ like emoticon
‫#‏خلي_دايما_طريقك_GO‬
‫#‏ادمان_تجربه‬

cluster

Cluster 

تعال نتكلم عن موضوع جديد :)

سمعت قبل كدا عن حاجه اسمها cluster ؟؟ تعرف انك ممكن كتير بتقف في الحته المتعلقه بيها وانت شغال علي الجهاز و تضايق كدا  ؟؟  

اي هو بقا موضوع ال cluster دا  =D

بص يا سيدي .. انت دلوقتي لما بتقسم ال hard disk بتاعك وانت بتعمل  install   لل windows او حتي من خلال برنامج يعني ... بتعمل كل  partition   مساحه معينه من مساحه ال hard disk جميل قوي  :)

المساجه ديه بقا بتتقسم لحاجه اسمها cluster وطبعا كل  cluster  بيكون ليه مساحه معينه  و بتختلف المساحه ديه باختلاف نوع formatting  system  ... يعني مثلا انت عندك نوم  formatting  system  عباره عن FAT 32  فبيكون حجم ال cluster  في الوقت دا حوالي 16KB  لكن ان كان ال formatting  system عباه عن NTFS  فبيكون حجم ال cluster حوالي 4KB وبس ... طبعا تقدر تحسب ان كان عندك hard disk 500GB  وبتستخدم نوع formatting  system معين بيكون في كام cluster  عندك  =D

جميل قوي لحد كدا ...لاحظ ان طبعا ال formatting  system لما يكون NTFS  بيكون افضل لانه بيستغل المساحه افضل و بتقل حجم الاهدار ... لما يكون مثلا عندك اخر cluster وانت بتحفظ ملف معين فيه بس 1KB  يبقا بتهدر بس 3KB  في حاله NTFS  لكن في حاله FAT 32 بتهدر حوالي 15KB .

عرفت ليه انا قلت انك بتقف في الحته ديه كتير وتضايق ؟؟

علشان لما مثلا تيجي تفتح ملف و يظهر المحتوي بعد ثواني مش علي طول ... دا بيكون ناتج عن انه بيجمع ال data من ال cluster المختلفه لكن بطي شويه لان ال data مش بتكون في مكان واحد :)

اتمني اكون قدمت معلومه جديده  :)
شير .. ضيف معلومات اكتر وعلم غيرك (y)

#‏خلي_دايما_طريقك_GO‬
‫#‏ادمان_تجربه‬

نجد العلم عندما نبحث عنه (1)

نجد العلم عندما نبحث عنه 

هتكلم في نقطه مهمه جدا النهرده ... الناس البتحب تتعلم وتفيد نفسها علشان تقدر تواجه سوق العمل الصعب بعد كدا اكيد في الاول بيكون صعب عليها انها تتعلم لوحدها ... بيكون قدامها عدد من الحلول ممكن من خلالها تعرف تمشي في الطريق الصح .

دلوقتي مثلا انا شغال في #مجال_الشبكات  و وقفت معايا حاجه مش عارف حل ليها ... الطبيعي اني احاول احلها الاول مره واتنين .. طيب مفيش خالص يبقا ادور علي حلها .. وهنا نيجي لنقطه مهمه جدا ازاي تدور علي حلها ؟؟ 

نصيحه من اخوكم  :)
انك تدور علي حل مشكله وقفت معاك مش صعب خالص زي ما انت متصور ... مش هبالغ قوي بردو ساعات في مشاكل بتقف مع الواحد مش بيعرف ليها حل ... لكن تعال للجزء الايجابي في الموضوع انت بعد اي مشكله مفروض اتعلمت منها  وخبرتك في المجال كبرت :)

فعلشان كدا انك تدور علي حل مشكله وقفت معاك مكن بكل سهوله تدخل علي اي محرك بحث و افضلهم Google​  طبعا و السبب ان كميه الكلمات المحفوظه عليه كبيره جدا  وممكن كلمه بسيطه تجبلك كل حاجه مرتبطه بالموضوع شغل database  عالي  .. انت بقا تكتب مشكلتك بكلمات بسيطه جدا من حوالي كلمتين ل خمس كلمات مثلا يعني ... والحلول للمشكله ديه هتظهر ليك  علي طول وانت تجرب حل حل ... وصدقني مش فكره تضييع وقت انت كدا عرفت حلول كتير جايز ينفع حل واحد منهم عندك لكن بعد كدا ممكن الحلول التانيه تنفع مع ناس تانيه ... مثال بسيط النهرده الجهاز بتاعي مكنش عايز يشوف اي فلاش ميموري خالص .. بيعمل الصوت الـ احنا عارفينه دا لكن مش بتظهر خالص جمب ال partition الموجود  اي حاجه ؟؟ فضلت ادور علي حل  لحد لما لقيت الموضوع بسيط خالص و اتحلت المشكله :)

خلاصه الكلام  .. ( نجد العلم عندما نبحث عنه ) :)

( دور وانت تلاقي .. اسئل وانت تعرف )
استعن بالله ولا تعجز قبل اي حاجه :)

شير وعلم غيرك  او اعمل منشن لاي حد محتاج الكلام دا :)


‫#‏نجد_العلم_عندما_نبحث_عنه‬ like emoticon
‫#‏خلي_دايما_طريقك_GO‬
‫#‏ادمان_تجربه‬

القواعد ال20 للنجاح

بسم الله الرحمن الرحيم 

القواعد ال20 للنجاح

بصو بقا في شويه حاجات  لازم نتكلم عنها بخصوص اي كورس هتخده بعد كدا اين كان بقا  كورس CCNA S&R او غيره  ولازم الكل يعرفها لكن ان في ارقام هتكون بخصوص كورس CCNA  :)

1) ان هتدرس الكورس لوحدك يبقا تضبط يومك بحيث يكون ساعتين علي الاقل في اليوم مذاكره وبكدا ان شاء الله ممكن تخلص تحضير للامتحان في حوالي شهريين بالكتير :)

2) ان هتدرس في مركز اسئل كويس علي المدرب واسئل عن المركز هل هو معتمد ولا ايه ... حاول تكون بتاخد الكورس من مكان معتمد :)

3) ان هتدرس الكورس في مركز ... اغلب المراكز بيكون الكورس مرتين في الاسبوع حوالي 4 ساعات ... لازم قبل ما تروح المحاضره تكون مراجع وان حتي تبص علي الفات كله لسبب مهم جدا في اجزاء معتمده علي القبلها فبكدا تكون مستوعب اكتر وتفهم اسرع الجزء الجديد :)

4) ان هتاخد الكورس لوحدك او في مركز يبقا يكون معاك كشكول محترم او شويه ورق علي حسب راحتك وتكتب الخلاصه من المحاضره ... هتحتاج الخلاصه بعدين قوي قوي قوي صدقني .. وعلي فكره الخلاصه ديه هي الهتراجع منها قبل المحاضره البعدها " افضل ليك واسرع كمان " :)

5) كل لما تخلص جزء من الكورس حاول تراجعه كله وتربطه ببعض كويس علشان تثبت المعلومه في دماغك قوي ... ساعات معلومات مش بتكمل الا لما تربط موضوع بموضوع ومحاضره بمحاضره  :)

6) كل لما تاخد جزء عملي حاول تطبقه هو و الجزء القبله كمان علشان مش تنسي ... قله التطبيق بتخليك تنسي  :)

7) حاول تدخل في نقاش دايما مع زمايلك ان بتاخد الكورس في مركز ... النقاشات الكتير في الكورس بتزود المعلومه و بتثبتها في دماغك قوي ... وان بتاخد الكورس لوحدك في البيت في كذا جروب ممكن تكون عليه وتسئل وغيرك يجاوب وهكذا :)

8) حاول تساعد غيرك ان حاجه واقفه معاه ... مساعدتك لغيرك ليها فوايد كتير قوي ... طبعا خير بتعمله وحاجه تاني المعلومه بتثبت بردو و ممكن بسبب مساعدتك لغيرك تكتشف معلومه من كلمه في النص مش كنت مركز فيها :)

9) اول ما تقرب تخلص الكورس ان بتخده  في المركز بشهر كدا ابدا اعمل اجراءت حجز الامتحان لان غالبا هتاخد شهر  وكل اسبوع تتصل بيهم وتاكد عليهم و تخلي بالك من اسمك والاميل تكتبهم صح وتتاكد من كدا  بدل المره اتنين لان غالبا بينسو  وان بتخده لوحدك حاول بردو نفس الفكره ضبط قبل معاد الامتحان بشهر و زن عليهم كل شويه ... زن قوي :)

10) قبل ما تدخل الامتحان ضبط من اسبوعين لشهر علي حسن تقديرك للكورس ولقدرت  تراجع فيهم المنهج بجدول محدد .... وتحل كتير قوي لحد لما توصل لمرحله انك تحل من غير ما تقرا باقي السؤال :)

11) للاسف مش كل الاسئله مفهومه في اسئله لازم تحفظها ... وعلي فكره في احتمال كبير انك ان مش حفظت الاسئله ديه ممكن لقدر الله مش تعدي في الامتحان ... لكن دايما خدها نصيحه " افهم كويس قوي علي قد ما تقدر وبعد كدا احفظ  كل حاجه فهمتها " هيكون افضل ليك .... وان مش قدرت تفهم ولا حد قدر يساعدك انك تفهم حاجه  احفظها :)

12) قبل الامتحان بيوم اهدي خالص  وحاول تعمل 3 حاجات وبس ...
- اول حاجه تراجع من الكشكول او الورق الكتبت فيهم النقط المهمه.
- تاني حاجه هتحل الامتحانات الموجوده بايدك اكتر من 10 مرات لحد لما توصل لمرحله انك بتحل الدمب كله مع بعض من غير اي غلطه .
- ثالث حاجه هتراجع العملي بايدك كل اللابات علي البرنامج .

13) علشان النجاح  لازم تجيب حوالي 825 من 1000 ... درجه كبيره جدا حتي في الكليات مش بنجبها ... لكن عايز اقولك ان عملت كل القلتلك عليه هتجيب ال 1000 من 1000 ان شاء الله وبسهوله كتير قوي جابوها :)

14) الامتحان حوالي ساعتين  لحوالي 51 سؤال بيكون منهم حوالي 3 لابات ... علي ما اظن وقت كتير قوي ممكن تخلص في اقل من ساعه علي فكره بس نصيحه " براحتك خالص انت مش هتتعب التعب دا كله وفي الاخر مستعجل مش لجنه كليه هي"  :)

15) لقدر الله ان لقيت سؤال جديد مش  تقلق فكر براحه وان شاء الله هتحله بسهوله وان خلاص جاب اخره معاك حاول تبعد الاجابات المستحيل تكون صح واستعن بالله واختار افضل اجابه :)

16) خلي بالك مش ينفع تعدي السؤال الا واذا انت حالل السؤال مش تقول هسيبه للاخر يعني :)

17) اسمع كل التعليمات كويس من المركز  وركز في الكلام علشان الغلطه ممكن تتحسب عليك ... وخلي بالك انت بتكون متصور اوعا تعمل حاجه كدا ولا كدا ;)

18) بعد اخر سؤال في الامتحان احمد ربنا واستعد للنتيجه ... ايوه هتظهر قدامك علي طول بعد اخر سؤال ... مهما كانت هي ايه قول الحمد لله .... لكن ان شاء الله هتكون جايب ال 1000 من 1000  ونقولك مبروك يا هندسه :)

19) بعد ما تخلص مش تنسي تاخد ورقه من المركز تثبت انك الحمد لله نجحت هتفيدك بعد كدا  وحاول تضبط معاهم موضوع انك تطلب الشهاده اين كانت نسجه تتبعت ليك PDF او تيجي ليك لحد البيت ... هما فاهمين اكتر مننا بدل ما نبهدل الدنيا :)

20)  مش تنسي تدعي لينا بقا وان في حاجه تاني ان شاء الله هنزلها مره تاني  ... وحاول توصل الكلام دا كله لصحابك بقا وفدهم كدا .... ربنا يتقبل منا ومنكم صالح الاعمال :)

Certified CCNA

بسم الله الرحمن الرحيم 

في ناس ناويه تبدا كورس CCNA الفتره الجايه اكيد ... اهو الاجازه هتبدا كلها ايام وان حابب تبدا في الكورس لازم تبدا في اسرع وقت ممكن ... العلم بيتقدم وناس غيرك كتير بتتقدم عليك .

علشان كدا لازم تبدا في طريقك في اسرع وقت ممكن وقبل ما تبدا في الكورس ان مش عندك معلومات خالص عن مجال الشبكات عموما تقدر تعرف بعض الموضوعات البسيطه  وتقدر  تعرف ازاي تبدا في مجال الشبكات  هنا ان شاء الله ;)

https://www.youtube.com/watch?v=ch8YzcnpJ4U

بص بقا يا سيدي خد الكلام دا من واحد بدا الكورس من حوالي 9 شهور  والحمد لله بقا معاه الشهاده من حوالي 5 شهور .... يبقا كدا الكورس اخد معايا حوالي 4 شهور ... جميل قوي :) :)

هو الكورس ان هتخده في مركز هياخد منك حوالي شهريين ونص كدا واعبال ما تحضر نفسك للامتحان يعني واجراءات الحجز والكلام دا كله هنقول 4 شهور ... عرفت انا اخته في 4 شهور ليه  =D

انا حبيت ابدا طريق الكورسات في مركز لان مكنتش اعرف حاجه ولسا مش اعرف في بدايه طريقي يعني ... قلت علشان افهم صح البدايه من شخص اعلم مني والحمد لله ربنا كرمني واخته في مركز داتازون في السويس علي ايد المهندس أحمد نظمي :)

كفايه كلام في الحته ديه ... خليني افيدك اكتر بقا ... شوف نفسك حابب تخده في مركز ولا حابب تدرس لوحدك ... في الحالتين انت هتختار ... علي اساس كذا حاجه طبعا  تقدر تعرف كل حاجه بالنسبه للنقطه دي هنا ;)

https://www.youtube.com/watch?v=hU-qX3K6OoM

كدا انت ان شاء الله عرفت تحدد ازاي تاخد الكورس او اي كورس تاني ان شاء الله  علي حسب الامكانيات المتاحه ليك تمام  قوي كدا  :)

ناقص تبدا  =D =D

بص بقا يا سيدي  انا الحمد لله اليوم البقيت فيه حاصل علي الشهاده .... قررت اعمل بوست محترم  افيد فيه كل الناس بكل حاجه معايا للكورس وعلشان كدا اتفضل .... افضل ماتريل تذاكر منها للكورس و ان شاء الله تنجح وتبقا تمام ونقولك يا هندسه :)


دي الماتريل الذاكرت منها علشان اقدر اكون Certified CCNA  :) :)

نقطه مهمه جدا طبعا الماتريل دا لحد اليوم شغاله والحمد لله ومش بيخرج منها الامتحان لكن قبل ما تدخل الامتحان لازم تتاكد ان هي لسا صالحه ومفيش جديد  :) :)

نقول بسم الله  ونبدا :)

سلسله محاضرات المهندس Ahmed Nazmy​ للمنهج  :)
https://www.youtube.com/playlist?list=PL77yNtB4-LjmpejXnbRbtds5aCxoU8uaR

-------------------------------------------------------------------------

سلسله محاضرات المهندس احمد نظمي  لحل الاسئله :)
https://www.youtube.com/playlist?list=PL77yNtB4-Ljl7u-EtBPf1U1gsfYjH3-Qm

-------------------------------------------------------------------------

محاضرات المهندس احمد توفيق لحل اللابات :)

1-https://www.youtube.com/watch?v=Y7t26ePLMVg 

2-https://www.youtube.com/watch?v=kZuHvKUjFp0

3-https://www.youtube.com/watch?v=RrcM8yqIyaE

4-https://www.youtube.com/watch?v=3d9fMZFJkbQ

-------------------------------------------------------------------------

اسئله Watson.314q :)
http://examsforall.com/exams/cisco/200-120/Cisco.Actualtests.200-120.v2013-12-09.by.Watson.314q.vce/#.VKV1ASuUdpM

-------------------------------------------------------------------------

اسئله حل ال Lap من موقع gutu  :)

1-EIGRP Troubleshooting Sim :

http://www.9tut.com/eigrp-troubleshooting-sim#more-2252

2-OSPF Neighbor Sim
http://www.9tut.com/ospf-neighbor-sim#more-2243

3-CCNA EIGRP LAB Question
http://www.9tut.com/64-ccna-eigrp-lab-question#more-29

4-CCNA Access List Sim
http://www.9tut.com/70-ccna-access-list-sim#more-39

5-CCNA Access List Sim 2
http://www.9tut.com/78-ccna-access-list-sim-2#more-41

-------------------------------------------------------------------------

بالاضافه الي كام سؤال جديد حصلت عليهم من خلال الاستاذهalaa.ebrahem بارك الله فيها :)
http://www.4shared.com/zip/kCkyleL0ba/new_Q.html

-------------------------------------------------------------------------

دي الكتب الرسميه للمنهج من الشركه نفسها ... الاستاذه Cisco    

علشان ناس كتير طلبت مني الكتب ... لكن معلش قبل ما تبص علي الكتب لازم تكون علي علم بالمنهج ولو بسيط علشان في ناس كتير بتتقفل من الكتب بسرعه للاسف حاول تذاكر جزء جزء من المنهج علي صوره فديوهات مثلا وبعد كدا شوف الجزء بتاعها في الكتب هيكون افضل ليك ان شاء الله

http://www.mediafire.com/…/176924yq4bz4rj4/ICND1_100-101_Of…

http://www.mediafire.com/…/gyiy2nr62f3ay8l/ICND2_200-101_Of…

---------------------------------------------------------------------------

ودي برنامج packet tracer ... باختصار هو البرنامج البنجرب عليه اللابات ... ونصيحه للكل لازم تجرب عليه كتير اوي بالاخص اللابات ال 5 الذكرتهم علي موقع gutu في بوست فات لنك البوست هيكون في اخر البوست دا ان شاء الله

wink emoticonsmile emoticon
http://www.mediafire.com/…/1bgjee…/PacketTracer533_setup.exe

---------------------------------------------------------------------------

ودي برنامج VCE Player ... باختصار هو برنامج البنشغل عليه اسئله Watson.314q
smile emoticon
http://www.4shared.com/…/…/VCE_Player_Negm_Edition_v116.html

---------------------------------------------------------------------------

كفايه كدا النهرده كلام عن كورس CCNA ممكن بعد كدا نكمل كلام  :)


دعواتكم ربنا يتقبل :)

ICDL 2

تعال نتكلم عن موضوع مهم  اوي النهرده من موقف بردو  =D

لما كنت باخد ال ICDL كنت بحضر والمحاضر كان بيشرح الحاجه وانا عادي اخلص وافهم واقعد علي الفيس بقا  =D كنت معروف في المجموعه كلها بالموضوع دا ... حتي المحاضر حفظني من كدا  =D =D 

المهم بقا في يوم رحت الكورس لقيت مش عارف ادخل علي الفيس :( :( قلت اي في اي ... عرفت ان المهندس الـ ماسك المركز قفل انك تدخل علي الفيسبوك -_- اتعصبت الاول لكن قلت مش هقبل بكدا انا  =D دخلت جوجل ودورت ازاي هو عمل كدا ... فضلت ادور وادور ... مع العلم سعتها انا كنت مش اعرف حاجه في الكمبيوتر الا حاجات بسيطه جدا جدا ... لكن الحمد لله عرفت هو عمل اي ... ورجعت الفيسبوك تاني .. والمجموعه كلها اخدت مني الطريقه وشغلت الفيسبوك .. والمحاضر دخل قال اي دا -_- انتو ازاي عملتو كدا ههههههههههه  =D

الفكره هنا اي بقا :) الفكره انك لما تحتاج تعرف حاجه بيكون سهل انك تعرفها بس انت لازم تحطها في دماغك ... سعتها بس هتعرف ازاي تعمل الحاجه ديه ... وعلي فكره انا كنت واخد الموضوع عند في الاول   =D لكن بعد كدا اكتشفت ان هي ديه الطريقه الوحيده الــ من خلالها تقدر تتعلم ... انك تجرب الحاجه وتحاول تتعلم من اخطائك :)

ان حابب تعرف الطريقه سهله خالص .. مفروض اقولك خش دور انت كمان ... لكن مفيش مشكله سعتها انا عملت الطريقه ديه  =D

C:\Windows\System32\drivers\etc
وبعد كدا تفتح ملف Host من خلال ال Notepad و تكتب او تمسح الموقع الانت عايزه ... وتحفظ الملف علي كدا  =D

ان حابب تتعلم جرب علشان تتعلم  =D =D

ICDL

خليني النهرده احكي قصه بسيطه وركز معايا لان ليها هدف علشانك ... ايوه ليها هدف علشانك انت يا بتاع ال IT  

 ركز معايا بقا  =D =D

ICDL

من حوالي سنتين بدات كورس ICDL طبعا كلنا عارفين اي هو ال ICDL حاجه كدا بسيطه يعني .. لكن لما بدات كنت انا معرفش اي حاجه في الحاسب بمعني الكلمه .. وكانت بدايه طريقي في المجال بقا .. طبعا كان في مشاكل كتير اوي قابلت الواحد  .. كانت بسبب ان الواحد كان لسا مش عارف يمشي ازي ومع اول مشكله وقفت ومش عرفت اتحرك !!

الفكره هنا اي بقا لما اخت الكورس كان ليا هدف هو اني #ابدا كنت لسا في سنه اولي في الجامعه وقلت لنفسي لازم ابدا بدري علشان اقدر اعمل حاجه قبل ما اتخرج ...

ومع الوقت عرفت امشي ازاي وكملت الكورس واخت الشهاده والحمد لله حوالي 10 شهور علشان اخلص اخر امتحان فيها !!! تخيل 10 شهور ... واحد هيقول ليا اي يا عم كل دا حرام عليك !!! ما انا قلتلك الفكره ان الواحد كان بيبدا وفي ال 10 شهور دول اتعلمت كتير اوي .. واهم حاجه اتعلمتها سعتها ان ربنا عمره ما هيضيع تعبك وطالما انت عايز تبدا ربنا هيخليك تبدا وتكمل و تحقق كمان :) دلوقتي ان حد سئل وقال الشهاده دي تاخد معايا قد اي بقوله انت ان هتمتحن وبس ممكن شهر تخلص الموضوع .. وان هتاخد كورس يعني ممكن تاخد منك 3 شهور بالكتير شوف الفرق ... الفرق من ناحيتين :) اول حاجه المده الفرق كبير اوي طبعا ... تاني حاجه وانا بتكلم بتكلم بطريقه تانيه عن الطريقه الكنت بتكلم بيها من سنتين ... لاني اتعلمت وفهمت كتير .. فبحاول افيد غيري واخليه مش يقع في الحاجه الوقعت فيها :)

نقطه مهمه كمان بالنسبه للموضوع دا ... الشهاده مش ليها اي لزمه علي فكره ... بما انك راجل بتاع IT بالنسبه ليك ICDL ولا حاجه اصلا ... لكن معلش حاول تخدها علشان بتفرق اوي ساعات .. في واحد كان بيحي ليا ويقول ليا اعرف واحد قدم في الخليخ معاه شهادات كتير اوي .. الشركه في المقابله الشخصيه بترد عليه وتقوله معلش اسفين مش هنقدر نشغلك معانا ... الراجل قال ليه اي السبب ؟؟ قالو اصل حضرتك مش معاك ال ICDL !!! الراجل طبعا اتصدم من الرد  =D =D   حته ورقه خدها وريح نفسك ;)

الكلام كتير وطويل معلش بقا ... لكن جواه معاني كتير حاول تستفاد منها ;)

منشن لصحبك المحتاج الكلام دا :)

‫#‏خلي_دايما_طريقك_GO‬

شبكات في رسمه

شرح من نوع جديد   .... شبكات في رسمه

هنتكلم النهرده عن حاجه جميله جدا
هنتكلم النهرده عن علاقه انواع الشبكات (LAN , WAN, ......) و التوبولوجي بتاع الشبكه ( Point to point , start , Tree .........)
Network Type >>><<< Network Topology
هنقول اي بقا في الموضوع دا :)
اول حاجه طبعا احنا عارفين اي الفرق بين انواع الشبكات وبردو عارفين اي الفرق بين التوبولوجي بين الشبكات ... جميل اوي " ان مش تعرف ممكن مره تانيه نشرحهم " ... دلوقتي بقا عازيين نربط الاتنين ببعض ببعض الكلمات البسيطه :)
دلوقتي ان عندنا شبكه من النوع LAN مثلا .. في الحاله ديه ممكن يكون عندنا شبكه علي شكل Point to Point او ممكن علي شكل  Star  جميل اوي  =D
طويب ان عندنا شبكه من النوع WAN يبقا في الحاله ديه ممكن يكون عندنا شبكه علي شكل Tree مثلا ... و الشبكه في الحاله ديه عباره عن Point to Point and star يعني الاتنين مع بعض :)
زي بالضبط ما في الصوره كدا ... عندنا شبكه WAN ( هنفترض انها كدا يعني  =D مش الفكره دلوقتي ) الشبكه ديه عباره عن طبقتين  ... جميل اوي :) الطبقه الاولي عباره عن Point to Point والطبقه التانيه عباره عن Star والشبكه كلها عباره عن Tree .... يعني 3 انواع من Network Topology موجدين في الصوره  =D
وطبعا ان اتكلمنا عن ال LAN يبقا كدا بنتكلم عن نوعين بس موجدين  ... الاولي عباره عن Point to Point و التانيه عباره عن Star :)
فكره البوست دا انك تعرف ان كل حاجه في مجال ال Network متصل ببعض ولما تدرس حاجه حاول تربطها بغيرها :)
طبعا المثال بسيط جدا وممكن يكون معقد اكتر ... ركز انت علي الفكره بس في السطر الفات زي ما قلت :)
شير للفكره وعلم غيرك عن طريق الرسم =D

DNS

 DNS " Domain Name System "

- هو البروتوكول المسئول عن خدمه اسماء النظاقات ... اي يقوم بتحويل اي IP الي URL او العكس بحيث انه من الصعب حفظ جميع الاي بي لجميع الاجهزه او المواقع فيقوم DNS بهذا العمل فمثلا جهاز له ip بهذا الشكل 192.168.3.5  فمن الصعب جدا تذكر هذا ال ip غالبا بخلاف اذا كان لهذا ال ip اسم ليسهل الوصول اليه .

- نحن نكتب علي المتصفح اسم موقع ما يقوم DNS بتحويل هذا ال URL اليIP فيصل المتصفح الي destination ... ومن ناحيه اخره هناك الهاكر الذين يقومون بتصميم مواقع مشابه للمواقع الحقيقيه فيسهل بذلك سرقه اي اكونت لاي شخص ... فياتي دور DNS هنا بانه يقوم بتحويل هذا IP الي URL ايضا .

FTP

" FTP " file transfer protocol

- من اسمه يظهر تعريفه ... فهو البروتوكول المسئول عن نقل الملفات ويحدد اليه هذا النقل كيف يسير  ... باختصار كدا علشان الناس تفهم البروتوكول دا هو المستخدم لما حضرتك بتعمل تحميل لملفات ... نقل الملفات بين أجهزة الحاسوب سواء من حاسوب إلى حاسوب أو من حاسوب إلى خادم .

- يستخدم ال port رقم 21 لنقل اوامر آلاف تى بى بينما يستخدم ال port رقم 20 من أجل نقل البيانات .

يتبع ...

‫#‏خلي_دايما_طريقك_GO‬

HTTP

HTTP " hyper text transfer protocol

- فهو البروتوكول المسئول عن نقل ملفات النصوص التشعبيه .. حيث ان هذا البروتوكول الذي يقوم عليه عمليه التصفح الي الانترنت .

- ببساطه بردو علشان الناس تفهم ,,, البروتوكول دا هو البيظهر ليك علي الشمال فوق في اي لنك وانت قاعد علي الانترنت ... شفته ولا لسا ... هو المستخدم للتصفح و التحرك علي مواقع الانترنت .

- الهدف الأساسي من بنائه كان إيجاد طريقة لنشر واستقبال صفحات HTML.

- يستخدم  ال port رقم 80 للحصول على الصفحات المطلوبة .

يتبع..

‫#‏خلي_دايما_طريقك_GO‬

what is meaning of protocol ?

يعني اي بروتوكول ؟

باختصار  ومن غير كلام كتير ... البروتوكول هو قواعد بتنظم الاتصال والعمليات المختلفه داخل الشبكات .

يعني اي الكلام دا ... دلوقتي اي دولتين علشان يكون في علاقات بنهم بيكون بنهم حاجه اسمها بروتوكولات .. يعني اسس بيمشو عليها علشان تكون العلاقه بنهم كويسه بنظام معين مش يضر حد منهم .

تعال نربط الكلام دا بالشبكات عندنا ... جهاز عايز يتصفح موقع وجهاز تاني عايز يتصفح موقع تاني اي يفرق بنهم في الحاله دي .. البروتوكولات المستخدمه هتفرق بنهم بحيث هتقول للروتر الجهاز دا هيروح هنا والجهاز دا هيروح هنا .

طيب البروتوكولات دي قد اي ؟؟ عددها كام بالضبط ؟؟ 

اي نظام عموما بيكون فيه حوالي 65536 بروتوكول 
كل بروتوكول بيستخدم لوظيفه معينه .

يتبع ...

‫#‏خلي_دايما_طريقك_GO‬

training center (2)

training center

 لما كنت بدرس كورس CCNA  اول ما دخلنا المركز وبدانا الكورس كل واحد اخد قلم وكشكول سلك حلو كدا  حاجه كويسه من المركز  ... لما الكشكول خلص كنت هجيب واحد تاني دا الطبيعي يعني  ...  لكن انا بحب النظام اوي بحب اكتب الحاجه في مكان واحد او في نفس الحاجه ... فقلت لواحد كان معايا هات الكشكول بتاعك بما انك مش كتبت فيه ... الراجل كان هيجيبه والله لكن اخته الصغيره اخدته منه ههههههههه  المهم بقا قلتله خلاص انا هطلب من المركز واحد تاني ... مفروض هو واحد وخلاص يعني لكن قلت هطلب هيحصل اي يعني ...  وطلبت و السكرتاريه مش قالت حاجه علي طول اخت الكشكول ودخلت المحاضره  .

الفكره من الكلام دا اي .. واحد ممكن يقول ليا هو اي كلام وخلاص هستفاد اي انا من كلامك دا  ... هقولك يا ابو لسان طويل .

في ناس بتخاف تطلب حقها شوف ازاي وصلت انها مش قادره تطلب حقها ... من حق كل واحد فينا لما يدرس كورس في مركز انه يكون قاعد علي جهاز لوحده لكن ممكن مش يطلب حقه !!! من حق كل واحد فينا ان يشتغل عملي بايده لكن ممكن واحد مش يطلب حقه !!! ودي طبعا بيكون نتيجته سلبيه عليه ...

عشلان كدا كتبت الموضوع دا ... اطلب حقك ومش تكون محرج من كدا ... انت راجل بتدفع فلوس فخد حقك كامل من غير اي تردد .

‫#‏خلي_دايما_طريقك_GO‬

training center (1)

training center 

المراكز المعتمده ( مكان الامتحان للشهادات العالميه او المكان الموثوق البتاخد فيه الكورسات )  بيكون فيها الحلو و الوحش !!
النهرده هنتكلم عن حاجه مش كويسه موجوده في المراكز بتتعب ناس كتير .

لما حجزت امتحان CCNA  علشان امتحن وربنا يكرم يعني واكون Certified حصل معايا موقف غريب شويه ... انا امتحنت يوم 30/12/2014  يعني من  شهر .. مكنتش لاقي معاد امتحن فيه خالص فضلت اتكلم مع المركز ولازم امتحن مش هينفع  اكتر من كدا ... وفي الاخر اتحدد المعاد دا ليا .. الظريف بقا في الموضوع ان قبل الامتحان خلاص انا اعرف اليوم لكن لسا الوقت ... المركز بيصل بيا و بيقول ليا تحب تمتحن الساعه 12 الظهر ولا الساعه 6 بليل !! طبعا اتصدمت اوي طب ما في مواعيد اهو امال لي التسويح يعني ومش في مكان تقدر تحجز حضرتك والكلام التعبان دا !!

المشكله هنا ان كان في ناس كتير مش لاقيه مكان فعلا وكان نفسها تمتحن وتخلص وربنا يكرمها بقا وكدا .. لكن طبعا مش عرفو !!

الخلاصه العايزك تطلع بيها من البوست دا من الاخر كدا .. خليك ورا الحاجه لحد لما تتعمل ... ان هتمتحن قريب او لسا يعني ناوي تحجز امتحان من خلال مركز ... كل يومين اتصل و اتاكد ان الدنيا ماشيه كويس .. علشان دا مستقبلك انت محدش هيخاف عليه قدك .

‫#‏خلي_دايما_طريقك_GO‬

Protocol ICMP

Protocol ICMP

هو البروتوكول  المسئول عن تحقيق الاتصال مع الاجهزه ... يعني اي الكلام دي ... يعني من الاخر كدا هو البروتوكول المسئول عن  عمل الامر Ping وطبعا كلنا عارفين الامر Ping .. هو الامر البنستخدمه علشان نتاكد من اتصال الجهاز بالشبكه اين كانت نوع الشبكه ...فانت ممكن تكتب ping 192.168.2.4 وكدا انت بتشوف مثلا انت متوصل بالجهاز الواخد رقم ip بالمنظر دا في الشبكه ولا لا ... وممكن تتاكد ان كنت متوصل بالانترنت مثلا بانك تكتب الامر ping google.com عندك علي شاشه cmd او تكتب ال ip ل google ان تعرفه طبعا لكن تيسيرا عليك بنكتب كدا  :)

طبعا البروتوكول ICMP بيخرج من المصدر ويروح للمستقبل وبيقوم بالاتصال ... وهو البروتوكول الوحيد المش ليه رقم Port وان حابب امنع وجود العمليه دي اي عمليه ال ping بمنع تسطيب البروتوكول نفسه من علي الجهاز .. او طبعا ممكن نعمل ACL وامنع عمليه ال Ping :)

‫#‏خلي_دايما_طريقك_GO‬

Router Components

مكونات ال Router

بيكون عباره عن CPU وممكن اي نوع يشتغل عليه لان مش محتاج معالجه كبيره .. وعندنا RAM بيتم عليها اي شغل حصل علي الراوتر لحد لما بعمل Save ليها ... و عندنا ROM ودي عباره عن الشاشه السوده البتظهر في الاول علشان تعرض مكونات الجهاز ..  عندنا  Flash و بيكون فيه نظام التشغيل المشغل الراوتر يعني لما بيحصل Boot لنظام التشغيل بيكون من خلاله ... وعندنا NV RAM لحفظ الاعدادات التي تتم علي الروتر اي حفظ الاوامر  .

دا كان موضوع بسيط بمعلومات في غايه البساطه .. شارك معانا وضيف معلومات اكتر للموضوع  :)

‫#‏خلي_دايما_طريقك_GO‬

subneting

subneting

من اهم المواضيع التي يجب ان تكون علي علم بها في ‫#‏مجال_الشبكات‬ هو تقسيم الشبكات subneting

معني تقسيم الشبكات باختصار هو :
ان تقوم بتقطيع كل شبكه الي شبكات صغيره بحيث لا تقوم باهدار ال ip في الشبكه ... وهذا التقطيع يمكن ان يكون قطع متساويه وهو ما يطلق عليه FLSM اما ان يكون التقطيع الي قطع غير متساويه فيسمي VLSM ... وهذا في الاصدار الرابع من الاي بي IPV4 اما الاصدار السادس للاي بي IPV6 فيكون التقطيع فيه الي اجزاء غير متساويه فقط حتي يتم استخدام ال ip بصوره اكثر كفاءه .

من بعض مميزات تقسيم الشبكات :

‫#‏تنظيم_مصادر_الشبكه‬ ,,, بحيث ان كل مؤسسه او شركه تكون مقسمه الي اقسام وكل قسم لديه الشبكه الخاصه به فيكون العمل في المؤسسه او الشركه منظم و مرتب ... organize your resources

‫#‏القدره_علي_تطبيق_الامان_في_الشبكه_وزيادته‬ ... حيث كل شبكه منفصله عن الاخره فيكون عامل الامان اكبر لكل قسم في الشركه او المؤسسه secure your resourses

‫#‏السرعه_في_الاتصال_ونقل_البيانات‬ ... بحيث ان كل قسم يحتوي علي جزء من الاجهزه في المؤسسه او الشركه فيكون اسرع في الاتصال و نقل البيانات عن ان يكون كل الشركه علي شبكه واحده فيكون الاتصال ونقل البيانات بطي speedup your network

‫#‏سهوله_الصيانه‬ ... بحيث انه اذا حدث عطل في جهاز ما نستطيع ان نحدد العطل بسهوله لقله عدد الاحتمالات المتواجده عند تقسيم الشبكه بخلاف اذا كان لدينا شبكه واحده فيكون تحديد العطل لديه احتاملات كبيره maintenance will be easier

‫#‏خلي_دايما_طريقك_GO‬

OSI 7 Layer ( Physical Layer )

 بسم الله الرحمن الرحيم  

Physical Layer

النهرده هنتكلم عن طبقه Physical Layer ... اولا كدا هي عباره عن الطبقه رقم 1 من OSI فهي سابع طبقه تستخدم من جهه المرسل و اول طبقه تستخدم من جهه المستقبل 

هي الطبقه المسئوله عن تحديد كل ما يتعلق بالمكونات الماديه اللازمه لتوصيل الاجهزه المختلفه ببعضها البعض و تحديد نوع الاسلاك المستخدمه ... لنتذكر كل ما يتعلق بانواع الاسلام المستخدمه في الشبكات نعود لموضوع مهم وهو Types Of Wire Media

http://network-omar-ahmed.blogspot.com/2014/12/media-wireor-wireless-lan-wan-wire-wire.html

وهذه الطبقه مهمتها تحويل لغه الكمبيوتر اي الاصفار و الوحايد (0,1) لاشارات مناسبه لنوع السلك المستخدم اي تحويل Digital signal الي Analog Signal ... ويوجد العديد من ال Analog Signal مثل radio frequency او infrared waves 

وبكدا تم الانتهاء من شرح OSI 7 Layer  بشي من التبسيط ببعض المعلومات البسيطه جدا لكل مبتدا في المجال ... بتمني يكون كل سطر فيه معلومه قيمه بالنسبه ليكم ... بتمني تقيم علشان اقدر اكمل ... بالتوفيق للجميع ان شاء الله ... دعواتكم بالتوفيق و السداد 

صفحتنا علي الفيس بوك 

https://www.facebook.com/pages/Networks-For-All/376795975825097

شكرا 

OSI 7 Layer ( Data Link Layer )

 بسم الله الرحمن الرحيم  

Data Link Layer

اولا كدا هي عباره عن الطبقه رقم 2 من OSI فهي سادس طبقه تستخدم من جهه المرسل و ثاني طبقه تستخدم من جهه المستقبل .

طبقه Data Link Layer  هي الطبقه المسئوله عن تحديد الاجزه اللازم شرائها لبناء الشبكه علي حسب البروتوكولات المستخدمه في هذه الطبقه مثل PPP .... طبعا كلام مبهم شويه لبعض الناس ... نبدا من الاول كدا تمام ..  كنا قلنا ان في حاجه اسمها انواع الشبكات صح وعرفنا ان في نوع اسمه LAN وعرفنا ان ال LAN  هي شبكه داخليه بتتكون من 3 مكونات اساسيه  ... ان حابب تراجع الموضوع ممكن تشوفه هنا 

http://network-omar-ahmed.blogspot.com/2014/12/network-for-all-people.html

دلوقتي بقا طبقه ال  Data Link Layer  هي المسئوله عن ال LAN يعني بتحدد الاجهزه التي يتم شرائها لبناء الشبكه   ... والجهاز البيشتغل في هذه الطبقه هو ال Switch اظن كدا الصوره وضحت ... كدا افتكرنا حاجه جميله ركز معايا بناء الشبكه بيكون بواسطه Switch  وتوصيل الشبكات بيكون بواسطه Router . 

من اهم العمليات التي تحدث في طبقه Data Link Layer  هي عمليه CRC ... قبل ما نقول هي عباره عن اي هنقول ان طبقه Data Link Layer   بتتعامل مع حاجه اسمها Mac  ودي رقم ثابت لكل جهاز هنتكلم عنه ان شاء الله قريب بشي من التفصيل  ... نرجع لكلامنا عمليه CRC تتم عند الجهاز المرسل والجهاز المستقبل بحيث اذا تساوت القيم يكون ارسال البيانات سليم اما اذا اختلفت القيم يطلب الجهاز المستقبل ارسال البيانات مره اخري فهي عمليه حسابيه تتم للتاكد من ان عدد ال Frames التي تم ارساله كامل .

 Mac

بتمني يكون كل سطر فيه معلومه قيمه بالنسبه ليكم ... بتمني تقيم علشان اقدر اكمل ... بالتوفيق للجميع ان شاء الله ... دعواتكم بالتوفيق و السداد 

صفحتنا علي الفيس بوك 

https://www.facebook.com/pages/Networks-For-All/376795975825097

شكرا